Шуурхай штаб Онцгой байдлын ерөнхий газарт ажиллаж байна

Монгол Улсын Шадар сайд, УОК-ын даргын “Өвөлжилтийн бэлтгэл ажлыг хангах талаар авах зарим арга хэмжээний тухай” 10 дугаар тушаалаар УОК-ын Шуурхай штаб Онцгой байдлын ерөнхий газар дээр байгуулагдан ажиллаж байна.

Өвөлжилтийг хохирол багатай даван туулах, цаг агаарын аюулт болон гамшигт үзэгдлээс урьдчилан сэргийлэх, хариу арга хэмжээг шуурхай зохион байгуулах, хор уршгийг арилгах, “Шинэ хоршоо” хөтөлбөрийн хэрэгжилтийг хангах, мөн малчдын зээлийн зарцуулалт, төсөл хөтөлбөрийн хэрэгжилтийн үр дүнг дүгнэх, мэргэжил арга зүйн дэмжлэг үзүүлэх ажлыг улсын хэмжээнд зохион байгуулах, холбогдох яам, агентлагийн үйл ажиллагааг уялдуулан зохицуулах зорилготой байгуулагдсан Шуурхай штабт Хүнс, хөдөө аж ахуй, хөнгөн үйлдвэрийн яам, Хөдөлмөр Нийгмийн хамгааллын яам, Байгаль орчин, уур амьсгалын яам зэрэг холбогдох яам, агентлагаас бүрдсэн нийт 13 байгууллагын 51 албан хаагч томилогдон үүрэг гүйцэтгэж байна.

Түүнчлэн 21 аймгийн Шуурхай штабт холбогдох байгууллагуудын нийт 420 хүн ажиллаж байгаа юм.

 Онцгой байдлын ерөнхий газрын дарга, хошууч генерал Г.Ариунбуян Шуурхай штабт ажиллаж байгаа нийт бүрэлдэхүүний хөдөлмөр хамгаалал аюулгүй ажиллагаанд анхаарах, аймаг орон нутгийг нэгдсэн удидлага зохицуулалтаар хангаж, мэдээ мэдээллийг шуурхай солилцох, зудын хүндрэл үүсэх, нөхцөл байдал хүндэрсэн үед хариу арга хэмжээг шуурхай зохион байгуулан ажиллах үүрэг чиглэл өглөө.