Бүгд Найрамдах Узбекистан улсын соёлын өдөрлөгт урьж байна

 

"Үнэлж баршгүй соёлын өв" хэмээх Бүгд найрамдах Узбекистан Улсын соёлын өдөрлөг 2024 оны 11 дүгээр сарын 29-ний өдрийн 17 цагаас Улсын филармонийн танхимд болно.

Эрхэм хүндэт үзэгч Та бүхнийг тус улсын соёл, зан заншлыг илэрхийлэх соёлын өдөрлөгт хүрэлцэн ирэхийг урьж байна.

Узбекистан Улсын тухай Википедиа нэвтэрхий тольд:

Узбекистан Төв Ази, тэр дундаа Дундад Ази, ГЦ+5 цагийн бүст Казахстан, Киргиз, Тажикистан, Афганистан, Туркменистан таван улсаар хүрээлүүлж оршдог. Далайд гарцгүй эх газрын улс. 447 мянган хавтгай дөрвөлжин километр нутагтай (дэлхийд 51-р том, Монголоос 3,5 дахин бага). Баруун болон төв нутаг нь нам доор, зүүн хилээрээ 4000 м-ээс өндөр уултай. 90% цөл, 10% хувь үржил шимт хөндий.

Узбекистан улс түүхэндээ перс, түрэг, монгол, слав угсаатны эрхэнд орж явсан байна. Бухар, Самарканд гээд Торгоны зам дагуу эртний хотууд байдаг. ЗХУ бутарсан 1991 онд Бүгд Найрамдах Узбекистан Улс (БНУзбУ) нэрээр тусгаар тогтнож, 1992 онд НҮБ-д элсэн бүрэн эрх олжээ. Нэгдмэл төрийн байгууламж, ерөнхийлөгчийн эрх давамгайлах Бүгд найрамдах засаглалтай. Засаг захиргааны хувьд 12 муж, 1 бүгд найрамдах улс, 1 улсын хотод хуваагддаг. Улсын албан ёсны узбек хэлэнд улсаа латин үсгээр O'zbekiston хэмээн бичиж, [Узбекистан] гэж хэлдэг. Үүний -стан нь монголоор улс, орон гэх залгавар юм.

Өдгөө 30 сая хүн амтай (дэлхийд 46-р ордог). Хүн амын 80 хувийг эзэлсэн узбек үндэстнээс гадна орос, тажик, казах, хархалпак гээд 100 орчим ястан аж төрөн сууж байдаг ба бүх ардын 90 хувь ислам, 9 хувь христос шашны ёсыг дагадаг байна.

Узбекистан улс хөвөн, зэс, алт, уран, шатдаг хий гэх мэт олон төрлийн зүйл бүтээж дотоод гадаадад борлуулдаг. Нийт ДНБ-ийн хэмжээгээр дэлхийн 194 улсаас 69, нэг хүнд ноогдох дүнгээр 135-р байр хавьд явж байгаа. НҮБ, ТУХН, ШХАБ-ын гишүүн болж олон улстай харилцаа өргөжүүлж буйн дотор Монгол Улстай 1992 оны 1-р сарын 25-нд дипломат харилцаа тогтоосон байна.

Нийслэл Ташкент 2 сая оршин суугчтай. Мөнгөний нэгж — сум. Одоогийн ерөнхийлөгч нь Шавкат Мирзиёев.

Монгол Улсын Ерөнхийлөгч Ухнаагийн Хүрэлсүх 2024 оны 6-р сарын 24-25-нд Узбекистан улсад албан ёсны айлчлал хийсэн.