“Соёлын бүтээлч сар” аян өндөрлөлөө

Соёл, урлаг, бүтээлч үйлдвэрлэлийн салбарт шинэ боломж, мэдлэг олгох зорилготой “Өвлөн бүтээх өнөө ирээдүй” уриан дор зохион байгуулсан “Соёлын бүтээлч сар” аян арван нэгдүгээр сарын турш улс орон даяар амжилттай зохион байгуулж өндөрлөлөө.

Аяны хүрээнд соёлын үйлдвэрлэл, бүтээлч үйл ажиллагааг дэмжих, түүнийг олон нийтэд танилцуулах зорилгоор соёлын олон талт арга хэмжээ, үзэсгэлэн, семинар, мастер сургалт, урлагийн тоглолт, экспо, хэлэлцүүлэг гэх мэт нийт 2715 арга хэмжээг Соёл, Спорт, Аялал жуулчлал, Залуучуудын яам, Засгийн газрын Хэрэгжүүлэгч агентлаг Соёл, урлагийн газар, Биеийн тамир, Спортын Улсын хороо болон 21 аймаг, нийслэлд үйл ажиллагаа явуулж буй өмчийн бүх хэлбэрийн соёл, урлагийн байгууллагууд улс орон даяар зохион байгууллаа.

Тухайлбал, Соёлын төвүүд 632,011 иргэнд, Музейд 125,396 иргэнд, Номын сангууд 121,187 иргэнд, Театр, чуулгууд 93,975 иргэнд, Бусад соёл урлагийн байгууллагууд 2,121 иргэдэд тус аяны хүрээнд соёл, урлагийн үйлчилгээ үзүүлж, аяны зорилго, зорилт, үр дүн, ач холбогдлыг сурталчлан ажиллалаа.

“Соёлын бүтээлч сар” аянд олон нийтийн оролцоо, идэвхтэй хандлагыг дэмжих зорилгоор амжилттай хийгдсэн үйл ажиллагаанууд нь иргэдэд соёлын өвийг хадгалах, бүтээлч салбарыг хөгжүүлэх, соёлын олон талт илэрхийллийн ач холбогдлыг ойлгуулахад чухал үүрэг гүйцэтгэсэн гэж оролцогчид үнэлж, дүгнэж байна.

Энэ удаагийн аяныг “Соёлын өв”, “Урлаг, уран бүтээл”, “Соён гэгээрэл”, “Спорт” гэсэн төрөлд ангилан орчин цагийн Монгол Улсын түүхэнд онцлох гавьяа байгуулсан эрхэм хүмүүсээс дөрвөн хүмүүнийг алдаршуулан, тэдний эрхэмлэн дээдэлж ирсэн үнэт зүйлс, ур чадвар, гавьяат үйлсийг хойч үе, хүүхэд, залууст сурган таниулах, түгээхэд чиглэсэн болно. Тухайлбал, Соёлын өвийн төрөлд Улсын их хатан Дондогдулам, Урлаг, уран бүтээлийн төрөлд Монгол Улсын Төрийн шагналт, Урлагийн гавьяат зүтгэлтэн Эрэгзэнгийн Чойдог, Соён гэгээрэл төрөлд Монголын орчин цагийн уран зохиолыг үндэслэгчдийн нэг, их зохиолч Сономбалжирын Буяннэмэх, Спортын төрөлд Монгол Улсын Гавьяат тамирчин, Хөдөлмөрийн баатар, Дархан аварга Жигжидийн Мөнхбат зэрэг түүхэн хүмүүсийг алдаршуулав.

“Соёлын бүтээлч сар" аяны хүрээнд соёл, урлагийн байгууллагуудаас Тоглолт, арга хэмжээ 959, Боловсролын хөтөлбөр 578, Хэлэлцүүлэг, сургалт, хурал 558, Нөлөөллийн ажил 620-г тус бүр зохион байгуулж, нийт 974,690 иргэн соёл, урлагийн үйлчилгээнд биечлэн хамрагдсан бол цахим хэлбэрт давхардсан тоогоор 6,984,702 иргэнд аяны мэдээллийг хүргэсэн байна.

Аяныг зохион байгуулахад хамтран ажилласан нийт соёл, урлагийн байгууллагуудын удирдлага, ажилтан, албан хаагчдадаа болон энэхүү аянд оролцсон нийт иргэд, үйлчлүүлэгчдэдээ гүн талархал илэрхийлж, та бүхний гэр бүлд сайн сайхныг хүсэн ажил сурлагад нь өндөр амжилт хүсэн ерөөе.

Өв соёл минь өнөд оршин, өөдөө мандаж, хөгжилд түүчээлэх болтугай